ଆଜି ରାଜ୍ୟସଭାରେ ନାଗରିକତ୍ବ ସଂଶୋଧନ ବିଧେୟକ ଗୃହୀତ ହେବାର ଆଶା ରହିଛି

An Independent Media

ନୂଆଦିଲ୍ଲୀ : ନାଗରିକତ୍ବ ସଂଶୋଧନ ବିଧେୟକ (ସିଏବି) ସୋମବାର ରାତିରେ ଲୋକସଭାରେ ୩୧୧-୮୦ ବହୁମତରେ ଗୃହୀତ ହେବା ପରେ ବୁଧବାର ରାଜ୍ୟସଭାରେ ଆଗତ ହେବାକୁ ଯାଉଛି। ୨୪୫ ସଦସ୍ୟ ବିଶିଷ୍ଟ ଉଚ୍ଚ ସଦନରେ ବିଧେୟକ ଗୃହୀତ କରାଇବା ପାଇଁ ସରକାରଙ୍କୁ ୧୨୩ ସଦସ୍ୟଙ୍କ ସମର୍ଥନର ଆବଶ୍ୟକତା ରହିଛି। ସରକାରଙ୍କ ପକ୍ଷରେ ଆବଶ୍ୟକ ସମର୍ଥନ ରହିଥିବାରୁ ଏହା ସୁରୁଖୁରୁରେ ଗୃହୀତ ହେବାର ଆଶା ରହିଛି। ସମ୍ପ୍ରତି ରାଜ୍ୟସଭାର ସଦସ୍ୟ ସଂଖ୍ୟା ୨୩୮ ରହିଛି। ଏଥିରେ ବିଜେପି ନେତୃତ୍ବାଧୀନ ଏନ୍‌ଡିଏର ସଦସ୍ୟ ସଂଖ୍ୟା ୧୦୫ ରହିଛି। ବିଜେପିର ୮୩ ସଦସ୍ୟ ଥିବାବେଳେ ଏନ୍‌ଡିଏ ଅଂଶୀଦାର ଜେଡି(ୟୁ)ର ୬, ଶିରୋମଣି ଅକାଳି ଦଳର ୩ ଏବଂ ଏଲଜେପି ଓ ଆରପିଆଇ(ଏ)ର ଜଣେ ଲେଖାଏଁ ସଦସ୍ୟ ଅଛନ୍ତି। ଏତଦ୍‌ବ୍ୟତୀତ ୧୧ ମନୋନୀତ ସଦସ୍ୟଙ୍କ ସମର୍ଥନ ସରକାରଙ୍କ ପ୍ରତି ରହିଛି। ବିଜେପି ପକ୍ଷରୁ ୧୧ ସଦସ୍ୟ ବିଶିଷ୍ଟ ଏଆଇଏଡିଏମ୍‌କେ, ଦୁଇ ସଦସ୍ୟ ଥିବା ୱାଇଏସ୍‌ଆର କଂଗ୍ରେସ, ତେଲୁଗୁଦେଶମ୍‌ର ୨ ସଦସ୍ୟଙ୍କ ସମର୍ଥନ ପାଇଁ ଆଲୋଚନା ଚଳାଇଛି। ଏହି ଦଳର ସଦସ୍ୟମାନେ ଲୋକସଭାରେ ସରକାରଙ୍କୁ ସମର୍ଥନ କରିଛନ୍ତି। ଅପରପକ୍ଷରେ ଲୋକସଭାରେ ବିଧେୟକକୁ ସମର୍ଥନ କରିଥିବା ବିଜେଡିର ୭ ସଦସ୍ୟଙ୍କ ସମର୍ଥନ ରାଜ୍ୟସଭାରେ ମିଳିବା ଏକପ୍ରକାର ନିଶ୍ଚିତ ରହିଛି। ଏହି ୨୨ଙ୍କୁ ମିଶାଇଲେ ସରକାରଙ୍କ ପକ୍ଷରେ ମୋଟ ସଦସ୍ୟ ସଂଖ୍ୟା ୧୨୭ ହେଉଛି। ସଂଖ୍ୟାଗରିଷ୍ଠତା ପାଇଁ ୧୨୦ ସଦସ୍ୟଙ୍କ ସମର୍ଥନ ଆବଶ୍ୟକ ଥିବାରୁ ଏହି ଖେଳରେ ସରକାର ସହଜରେ ବିଜୟ ହାସଲ କରିବେ ଓ ବିଧେୟକ ଗୃହୀତ ହେବାର ଆଶା ରହିଛି।

error: Thank You Keep Visiting