ଚଳଚ୍ଚିତ୍ର ନିର୍ମାତା-ନିର୍ଦ୍ଦେଶିକା କଳ୍ପନା ଲାଜମୀଙ୍କର ପରଲୋକ

An Independent Media

ମୁମ୍ବାଇ: ହିନ୍ଦୀ ଚଳଚ୍ଚିତ୍ର ନିର୍ମାତା-ନିର୍ଦ୍ଦେଶିକା କଳ୍ପନା ଲାଜମୀଙ୍କର ରବିବାର ପରଲୋକ ଘଟିଛି। ଭୋର୍ ପ୍ରାୟ ସାଢ଼େ ୪ଟା ବେଳେ ମୁମ୍ବଇର ଏକ ଡାକ୍ତରଖାନାରେ ସେ ଶେଷ ନିଃଶ୍ୱାସ ତ୍ୟାଗ କରିଛନ୍ତି। ମୃତ୍ୟୁ ବେଳକୁ ତାଙ୍କୁ ୬୪ ବର୍ଷ ବୟସ ହୋଇଥିଲା। ତିନି ବର୍ଷ ଧରି ସେ କିଡ୍ନୀ କ୍ୟାନସରରେ ପୀଡ଼ିତ ଥିଲେ । କଳ୍ପନା, ପ୍ରସିଦ୍ଧ ଚିତ୍ରକାର ଲଲିତା ଲାଜମୀଙ୍କ ଝିଅ ଓ ପ୍ରସିଦ୍ଧ ନିର୍ଦ୍ଦେଶକ ଗୁରୁ ଦତ୍ତଙ୍କ ଝିଆରୀ। ତାଙ୍କ ମୃତ୍ୟୁରେ ବଲିଉଡର କଳାକାରମାନେ ଗଭୀର ଦୁଃଖ ପ୍ରକାଶ କରିଛନ୍ତି। ‘ରୁଦାଲୀ’, ‘ଦମନ’ ଓ ‘ଦରମିୟାନ୍’ ଭଳି ଚଳଚ୍ଚିତ୍ର ସେ ଦର୍ଶକଙ୍କୁ ଭେଟି ଦେଇଥିଲେ।

୧୯୯୩ ରେ ସେ ‘ରୁଦାଲୀ’ ଫିଲ୍ମ ନିର୍ମାଣ କରିଥିଲେ। ଏଥିରେ ଡିମ୍ପଲ୍ କପାଡ଼ିଆ ଅଭିନୟ କରିଥିଲେ। ଡିମ୍ପଲ ମଧ୍ୟ ଏହି ଫିଲ୍ମ ପାଇଁ ଶ୍ରେଷ୍ଠ ଅଭିନେତ୍ରୀ ଭାବେ ଜାତୀୟ ଚଳଚ୍ଚିତ୍ର ପୁରସ୍କାର ପାଇଥିଲେ। ୨୦୦୧ ରେ ସେ ‘ଦମନ’ ଚଳଚ୍ଚିତ୍ର ଭେଟି ଦେଇଥିଲେ। ଏଥିରେ ରବୀନା ଟଣ୍ଡନ ଅଭିନୟ କରିଥିଲେ। ଏହି ଫିଲ୍ମ ପାଇଁ ରବୀନାଙ୍କୁ ଶ୍ରେଷ୍ଠ ଅଭିନେତ୍ରୀ ଭାବେ ଜାତୀୟ ଚଳଚ୍ଚିତ୍ର ପୁରସ୍କାର ପ୍ରଦାନ କରାଯାଇଥିଲା। ୨୦୦୬ରେ କଳ୍ପନା ତାଙ୍କର ଶେଷ ଫିଲ୍ମ ‘ଚିଙ୍ଗାରୀ’ ନିର୍ମାଣ କରିଥିଲେ। ଏଥିରେ ମିଥୁନ୍ ଚକ୍ରବର୍ତ୍ତୀ ଓ ସୁସ୍ମିତା ସେନ୍ ଅଭିନୟ କରିଥିଲେ। କଳ୍ପନା ଦେଶର ପ୍ରସିଦ୍ଧ ଚଳଚ୍ଚିତ୍ର ନିର୍ଦ୍ଦେଶକ ଶ୍ୟାମ୍ ବେନେଗଲଙ୍କ ଅଧୀନରେ ସହ ନିର୍ଦ୍ଦେଶକ ଭାବେ କାର୍ଯ୍ୟ ଆରମ୍ଭ କରିଥିଲେ।

error: Thank You Keep Visiting