ମୁସଲମାନଙ୍କୁ ଛେଳି, ମହିଳାମାନଙ୍କୁ ସୁନା, ଛାତ୍ରୀଛାତ୍ରଙ୍କୁ ଶିକ୍ଷା ଏବଂ ଟ୍ରେନ ଓ ବସ୍‌ରେ ମାଗଣା ଯାତ୍ରା

Straight to the Point

ନୂଆଦିଲ୍ଲୀ: ନିର୍ବାଚନରେ ଭୋଟରଙ୍କୁ ଆକର୍ଷିତ କରିବା ଲାଗି ବିଭିନ୍ନ ଦଳ ଏବଂ ନେତା ନୂଆ ନୂଆ ତରିକା ଆପଣାଉଛନ୍ତି। ଦଳଗୁଡ଼ିକ ଇସ୍ତାହାର ଜାରି କରି ନାନା ପ୍ରତିଶ୍ରୁତି ଦେଇଛନ୍ତି। କିନ୍ତୁ ଏକ ପାର୍ଟି ଏଭଳି କିଛି ପ୍ରତିଶ୍ରୁତି ଦେଇଛି ଯାହା ଶୁଣିଲେ ଯେକେହି ଆଶ୍ଚର୍ଯ୍ୟ ହେବେ। ଉତ୍ତର-ପୂର୍ବ ଦିଲ୍ଲୀ ଲୋକସଭା ଆସନରେ ସାଞ୍ଝି ବିରାସତ ପାର୍ଟିର ପ୍ରାର୍ଥୀ ଅମିତ ଶର୍ମା ଏଭଳି ଅଜବ ପ୍ରତିଶ୍ରୁତି ଦେଇଥିବା ଦେଖାଯାଇଛି। ପାର୍ଟି ପକ୍ଷରୁ ଜାରି ଇସ୍ତାହାରରେ ପ୍ରତି ମୁସଲମାନ ପରିବାରକୁ ଇଦ୍‌ ସମୟରେ ଗୋଟିଏ ଲେଖାଏ ଛେଳି ମାଗଣାରେ ଦିଆଯିବ ଏବଂ ମଦ  ମୂଲ୍ୟ ଅଧା କରାଯିବ। ସେହିପରି ମହିଳାମାନଙ୍କୁ ମାଗଣାରେ ସୁନା ଦିଆଯିବ।

କେବଳ ଏତିକି ନୁହେଁ, ଛାତ୍ରୀଛାତ୍ରଙ୍କୁ ପିଏଚଡି ପର୍ଯ୍ୟନ୍ତ ମାଗଣା ଶିକ୍ଷା ଏବଂ ମେଟ୍ରୋ ଟ୍ରେନ ଓ ବସ୍‌ରେ ମାଗଣା ଯାତ୍ରା କରିବାର ସୁବିଧା ମିଳିବ। ଘରୋଇ ସ୍କୁଲରେ ବି ମାଗଣା ଶିକ୍ଷା ପ୍ରଦାନ କରାଯିବ। ସମସ୍ତଙ୍କୁ ରାସନ ସାମଗ୍ରୀ ମାଗଣାରେ ଯୋଗାଇଦିଆଯିବ। ବିଏସଇଏସ ଏବଂ ଡିସିଟିର ଅସ୍ଥାୟୀ କର୍ମଚାରୀଙ୍କୁ ନିୟମିତ କରାଯିବ। ଗୃହ ଟିକସ ଏବଂ ପାର୍କିଂ ଫି ଉଚ୍ଛେଦ କରାଯିବ। କନ୍ୟା ସନ୍ତାନ ଜନ୍ମ ହେଲେ ୫୦ ହଜାର ଏବଂ ବିବାହ ସମୟରେ ଅଢ଼େଇ ଲକ୍ଷ ଟଙ୍କା ଦିଆଯିବ ବୋଲି ଦଳ ପକ୍ଷରୁ ଘୋଷଣା କରାଯାଇଛି।

ସେହିପରି ଲୋକଙ୍କୁ ୧୦ଟଙ୍କାରେ ପେଟପୁରା ଖାଇବାକୁ ମିଳିବ। ବେକାର ଯୁବକଯୁବତୀଙ୍କୁ ମାସିକ ୧୦ ହଜାର ଟଙ୍କା ଭତ୍ତା ଏବଂ ବୃଦ୍ଧ, ବିଧବା ଓ ଦିବ୍ୟାଙ୍ଗଙ୍କୁ ମାସିକ ୫ ହଜାର ଟଙ୍କା ଭତ୍ତା ପ୍ରଦାନ କରାଯିବ। ଘରୋଇ ହସ୍ପିଟାଲରେ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ଚିକିତ୍ସା ସେବା ଯୋଗାଇ ଦିଆଯିବ ବୋଲି ଦଳ ପକ୍ଷରୁ ଘୋଷଣା କରାଯାଇଛି।

error: Thank You Keep Visiting