ସକ୍ରିୟ ହେବ ମୌସୁମି,ଆସୁଛି ଦୁଇଟି ଲଘୁଚାପ

Straight to the Point

ଭୁବନେଶ୍ୱର : ମୌସୁମି ଓଡ଼ିଶା ଛୁଇଁବାର ମାସେ ବିତିଗଲାଣି। ତଥାପି ଲଘୁଚାପ ନଥିବାରୁ ବଡ଼ ଧରଣର ବର୍ଷା ହୋଇନାହିଁ। ସବୁ ଅଞ୍ଚଳରେ ମୌସୁମି ବର୍ଷା ଠିକଣା ଭାବେ ହୋଇ ନଥିବାରୁ ଚାଷ କାର୍ଯ୍ୟ ପ୍ରଭାବିତ ହୋଇଛି।
ଏ ପର୍ଯ୍ୟନ୍ତ ମୌସୁମି ବର୍ଷା ସ୍ୱାଭାବିକଠାରୁ ୨୬ପ୍ରତିଶତ କମ୍‍ ରହିଛି। ଏଭଳି ସ୍ଥିତିରେ କେବଳ ଲଘୁଚାପ ବର୍ଷାକୁ ଅପେକ୍ଷା ରହିଛି। ପାଣିପାଗ ବିଭାଗ ଆକଳନ ଅନୁସାରେ ଆସନ୍ତା ୨୪ଘଣ୍ଟାରେ ଉତ୍ତର ବଙ୍ଗୋପସାଗରରେ ଲଘୁଚାପର ସମ୍ଭାବନା ଥିବାବେଳେ ୧୬ରେ ଆଉ ଏକ ଲଘୁଚାପ ସୃଷ୍ଟି ହେବ। ଯଦି ଲଘୁଚାପ ଘନୀଭୂତ ହୁଏ ତେବେ ରାଜ୍ୟରେ ବର୍ଷା ପରିମାଣ ବଢ଼ିବାର ସମ୍ଭାବନା ରହିଛି। ଉତ୍ତର ଓଡ଼ିଶା ଉପକୂଳରେ ସୃଷ୍ଟି ହୋଇଥିବା ଘୂର୍ଣ୍ଣିବଳୟ ଏବଂ ଟ୍ରଫଲାଇନ ଯୋଗୁଁ ରାଜ୍ୟରେ ମୌସୁମି ଧୀରେ ଧୀରେ ସକ୍ରିୟ ହେଉଛି। ଏହାର ପ୍ରଭାବରେ ଆସନ୍ତା ୨୪ଘଣ୍ଟା ମଧ୍ୟରେ ଉତ୍ତର ବଙ୍ଗୋପସାଗର ଏବଂ ଏହାର ପାଶ୍ୱର୍ବର୍ତ୍ତୀ ଅଞ୍ଚଳରେ ଲଘୁଚାପ ସୃଷ୍ଟି ହେବାର ସମ୍ଭାବନା ଥିବାବେଳେ ପଛକୁ ପଛ ଜୁଲାଇ ୧୬ରେ ଆଉ ଏକ ଲଘୁଚାପ ସୃଷ୍ଟି ହୋଇପାରେ। ଏହାର ପ୍ରଭାବରେ ଆସନ୍ତା ୧୬ ତାରିଖ ପର୍ୟ୍ୟନ୍ତ ବର୍ଷା ଲାଗିରହିବ ବୋଲି ପାଣିପାଗ ବିଭାଗ ପକ୍ଷରୁ ଆକଳନ କରାଯାଇଛି। ୧୬ତାରିଖରେ ଲଘୁଚାପ ସକ୍ରିୟ ହେଲେ ବର୍ଷା ପ୍ରଭାବ ଆହୁରି ବଢ଼ିପାରେ।
ଭୁବନେଶ୍ୱର ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ସୂତ୍ରରୁ ମିଳିଥିବା ସୂଚନା ଅନୁସାରେ ଆସନ୍ତାକାଲି ପୁରୀ, ଖୋର୍ଦ୍ଧା, ଜଗତସିଂହପୁର, କେନ୍ଦ୍ରାପଡ଼ା, କଟକ, ଢ଼େଙ୍କାନାଳ, ଅନୁଗୋଳ, ଦେବଗଡ଼, ସମ୍ବଲପୁର ଓ ନୟାଗଡ଼ ଆଦି ଜିଲାର କିଛି ଅଞ୍ଚଳରେ ପ୍ରବଳ ବର୍ଷାର ସମ୍ଭାବନା ରହିଛି। ସେହିପରି ୧୪ରେ ସୁନ୍ଦରଗଡ଼, କେନ୍ଦ୍ରାପଡ଼ା, ମୟୂରଭଞ୍ଜ, ବାଲେଶ୍ୱର, ଭଦ୍ରକ, ଦେବଗଡ଼, ସମ୍ବଲପୁର ଓ ଝାରସୁଗୁଡ଼ାରେ ଅଧିକ ବର୍ଷାର ସମ୍ଭାବନା ରହିଛି। ଗତ ୨୪ଘଣ୍ଟା ମଧ୍ୟରେ ମାଲକାନଗିରିରେ ସର୍ବାଧିକ ୫୪ମିମି ବର୍ଷା ହୋଇଥିବାବେଳେ କୋରାପୁଟରେ ୪୧, ଟିଟିଲାଗଡ଼ରେ ୩୪, ଝାରସୁଗୁଡ଼ାରେ ୨୭, ଭବାନିପାଟଣାରେ ୨୦, ଫୁଲବାଣୀରେ ୨୮, ଢ଼େଙ୍କାନାଳରେ ୨୬ମିମି ବର୍ଷା ହୋଇଛି। ଲଘୁଚାପ ସମୟରେ ଉତ୍ତରରେ ଅଧିକ ବର୍ଷାର ସମ୍ଭାବନା ରହିଛି। ଏହି ସମୟରେ ସମୁଦ୍ର ଅଶାନ୍ତ ରହିବାର ସମ୍ଭାବନା ଥିବାରୁ ମତ୍ସ୍ୟଜୀବୀ ସମୁଦ୍ରକୁ ଯିବାବେଳେ ସତର୍କ ରହିବାକୁ ପରାମର୍ଶ ଦିଆଯାଇଛି।

error: Thank You Keep Visiting